სატრანსფერო სეზონის დახურვამდე 57 წუთით ადრე ზაფხულის ყველაზე სერიოზული ქართული ტრანსფერი განხორციელდა - საქართველოს ნაკრების კაპიტანი კახა კალაძე "მილანიდან" "ჯენოაში" გადავიდა და კარიერის მომავალ ორ სეზონს ლიგურიის დედაქალაქში გაატარებს.

ბოლო დღეებში ჩვენს კაპიტანს სამი ვარიანტი ჰქონდა: 1. "მილანში" დარჩენა, რომელიც გარანტირებულ უთამაშებლობას უქადდა, სულ მცირე, იანვრამდე, რადგან გუნდის ხელმძღვანელობამ ის საჩემპიონო განაცხადშიც კი არ შეიყვანა. 2. "იუვენტუსში" გადასვლა ფაბიო გროსოს ნაცვლად, ამ ტრანსფერზე ბოლო 10 დღე ლაპარაკობდნენ, 3. "ჯენოაში" გადასვლა, ეს საკითხი მას შემდეგ დადგა დღის წესრიგში, რაც სალვატორე ბოკეტი "ჯენოადან" 15 მილიონ ევროდ გადავიდა ყაზანის "რუბინში".

ორშაბათს კალაძე ლიგურიის დედაქალაქში ჩავიდა და კლუბის ხელმძღვანელობასაც შეხვდა. წამი წამზე ველოდით ტრანსფერის გახმოვანებას და... ნაშუაღამევს იტალიურმა მედიამ გამოაცხადა, რომ კალაძემ უარი თქვა "ჯენოაში" გადასვლაზე და ისევ მისი გროსოში გაცვლა განიხილება აქტიურადო. სამშაბათს ეს ვარიანტი ჩაიშალა, მაგრამ, საბედნიეროდ, "ჯენოასთან" ყველაფერი მოგვარდა - ქართველი ფეხბურთელი 2 წლით გადავიდა "ჯენოაში". ეს ინფორმაცია კლუბის ოფიციალურმა საიტმა საღამოს 7-ის 3 წუთზე (იტალიური დროით) დააფიქსირა, ანუ სატრანსფერო სეზონის დახურვამდე 57 წუთით ადრე.

ამით 32 წლის კალაძის 9,5 წლიანი მილანური კარიერა დასრულებულია! ამ ხნის განმავლობაში მან 194 მატჩში 12 გოლი გაიტანა "მილანის" შავ-წითელი მაისურით. მან "მილანში" სკუდეტო მოიგო, კოპა იტალია, ჩემპიონთა 2 თასი, ევროპის სუპერთასი და საკლუბო მსოფლიოს ჩემპიონატი. "ჯენოა" 1893 წელს დაარსდა, ამ კლუბს 9-ჯერ აქვს მოგებული სკუდეტო. შარშან "ჯენოა" მე-9 ადგილს დასჯერდა.

ლელო