არნემის "ვიტესის" შემტევი გიორგი ჭანტურია უკვე საკმაოდ ხშირად ჩნდება ჰოლანდიის ელექტრონულ მედიაში. გუშინ ერთ-ერთმა იქაურმა საიტმა მცირე წერილი დაბეჭდა ჩვენებურზე.ჰოლანდიელები ამბობენ, ჭანტურია მნიშვნელოვან როლს ასრულებს "ვიტესის" ბოლოდროინდელ აღმავლობაში, "ვიტესი" ერედივიზიონში მეშვიდე ადგილზე რომ არის, სულ ცოტა ხნის წინათ ამას ძნელად თუ ვინმე იფიქრებდაო.
"როცა აქ შარშან მოვედი, კლუბში ნანახით შოკში ჩავვარდი. თამაში კარგად არ წაგვივიდა და კლუბში თავს კომფორტულად ვერ ვგრძნობდი.
ალბერტ ფერერი არ იყო ცუდი მწვრთნელი, მაგრამ ყველას როდი უნდოდა ყველაფერი გაეღო მისი გულისთვის.
ახლა კი ჩვენ მართლა გუნდი ვართ. შეიძლება ითქვას, რომ ახლა უფრო ძლიერები ვართ, თუმც ნებისმიერ მეტოქესთან ისე გვიწევს თამაში, თითქოს ქარცეცხლში გავდივართ", - უთხრა ჭანტურიამ "ვოეტბოლ ინტერნეიშენელს".
იონ ვან დენ ბრომის გაწვრთნილ "ვიტესში" ჭანტურიამ 16 მატჩი ითამაშა და 3 გოლი გაიტანა.
ყოველდღიური სპორტული გაზეთი "ლელო"
