გორის "დილამ" თურქულ შეკრებაზე ბოლო მატჩი ყაზახურ "კაირატს" 2:0 მოუგო. ალმატელთა გუნდმა ჩვენი ყურადღება იმით მიიქცია, რომ მის ძირითად შემადგენლობაში ზაზა ჭელიძემ ითამაშა. 24 წლის ცენტრალური ნახევარმცველი შარშარ ბრესტის "დინამოში" ცნობილ ბელარუსი მწვრთნელის, იური პუნტუსის ხელმძღვანელობით თამაშობდა. მაგრამ ფინანსური პრობლემების გამო ("დინამო" ხელფას-პრემიებს დროულად ვეღარ უხდიდა) ბრესტელები კონტრაქტის გაწყვეტაზე დაითანხმა.
იანვარში ის ფოთის "კოლხეთში" მიიწვიეს, მაგრამ მაშინაც ვწერდით, რომ მიწვევებს სხვა ქვეყნის კლუბებიდანაც ელოდა. საბოლოოდ ფეხბურთელი ყაზახეთში აღმოჩნდა.
მისი მენეჯერის ვახტანგ ხაინდრავას თქმით, ჭელიძის საკითხი უახლოეს დღეებში გაირკვევა.
"კაირატი" შარშან 12-გუნდიან ყაზახეთის ჩემპიონატში მე-9 ადგილზე გავიდა. მაგრამ ამან არ მოგატყუოთ - დეკემბერში ყველაზე ცნობილი ყაზახური კლუბის სპონსორი უმდიდრესი კომპანია "კაზროსგაზი" გახდა, მწვრთნელად კი "ასტონ ვილაში" ნამუშევარი ინგლისელი მწვრთნელი ჯონ გრეგორი მიიწვიეს, რომელიც, ბოლოს ისრაელის "აშდოდში" მუშაობდა.
ყოველდღიური სპორტული გაზეთი "ლელო"
