"ლელოსთვის" ცნობილი გახდა, რომ საქართველოს სუპერთასისთვის ქვეყნის ჩემპიონი "ზესტაფონი" თასის მფლობელ "გაგრას", შესაძლოა, 25 დეკემბერს შეხვდეს. ინფორმაცია ფეხბურთის ფედერაციაში დაგვიდასტურეს, მაგრამ ისიც გვითხრეს, რომ მატჩის გამართვის საბოლოო თარიღი და ადგილი ჯერაც დასაზუსტებელია.
რაც შეეხება შეხვედრის ადგილს - ფედერაციამ მთავრობის მიერ გამოყოფილი თანხებით ფოთის სტადიონზე ახალი საფარი უკვე დააგო და "ფაზისის" საზეიმო გახსნა სუპერთასის გათამაშებით სურს.
საფარი იმ ბერძნულმა კომპანიამ დააგო, რომელმაც ანალოგიური სამუშაოები ჩაატარა ქუთაისის "ტორპედოს" და თბილისის "ლოკომოტივის" სტადიონებზე. ფოთში მინდვრის დაგება 10 დღის წინ დასრულდა და 25 დეკემბრისთვის მოედანი მზად იქნება, მაგრამ პრობლემა "ფაზისზე" ინფრასტრუქტურის არარსებობაა - ინდივიდუალური სკამები აღებულია, გასახდელები, საშხაპეები, მსაჯთა და დელეგატთა ოთახები მოსაწყობია, მოკლედ, არ არის ის კეთილმოწყობილი გარემო, სადაც ასეთი რანგის მატჩი უნდა ჩატარდეს.
როგორც ჩანს, ფედერაცია სწორედ ამის გამო არ ჩქარობს სუპერთასის მატჩის გამართვის ადგილისა და თარიღის დასახელებას.
ყოველდღიური სპორტული გაზეთი "ლელო"
