ბუნებრივი იყო, რომ მასპინძელი ნაკრებები ევრო 2012-ის მიმდინარეობისას საკუთარ ქვეყანაში დაიდებდნენ ბინას. 14 სტუმარი ნაკრებიდან კი 12-მა უპირატესობა პოლონეთს მიანიჭა. ბუნებრივია, უკრაინელებმა საკუთარ თავს დაუსვეს შეკითხვა, რატომ მოხდა ასე? ქვეყნის არასახარბიელო რეპუტაცია, ინფრასტრუქტურული პრობლემები, მასპინძელი ქალაქების ხელმძღვანელთა სიზარმაცე და ასე შემდეგ ქვეყანას 2012 წელს სერიოზულ პრობლემებს ჰპირდება.
უკრაინის ნაკრების გარდა ამ ქვეყანაში ცხოვრებას მხოლოდ ორი სტუმარი დათანხმდა, საფრანგეთი, ვინც "შახტარის" ბაზაზე ივარჯიშებს და შვედეთი. ეს უკანასკნელი კიევში დაიდებს ბინას და "კონჩა ზასპეზე" მოემზადება. მიუხედავად იმისა, რომ უკრაინაში თითქმის ყველა ევროპული ნაკრების ხელმძღვანელი იყო ჩამოსული სასტუმროებისა და ბაზების სანახავად, ლვოვსა და ხარკოვში ცხოვრებას არც ერთი არ დათანხმდა.
უმრავლესი მათგანი კმაყოფილებას გამოთქვამდა ბაზების მინდვრის ხარისხით, კომფორტული სასტუმროებითა და ლამაზი პეიზაჟებით, მაგრამ საბოლოო ჯამში კიევისა და დონეცკის გარდა მათი ყველა მოთხოვნა ვერსად დაკმაყოფილდა. "ამაში არაფერი ტრაგიკული არ არის, - განაცხადა უკრაინა 2012-ის დირექტორმა მარკიან ლუბკივსკიმ. - რამდენიმე ისეთი ნაკრები, რომელსაც ცხოვრება უკრაინაში სურდა, კენჭისყრის შემდეგ "პოლონურ ჯგუფებში" მოხვდა, მაგალითად რუსეთისა და ხორვატიის დასახელება შეიძლება. სამაგიეროდ უკრაინაში ყველაზე საინტერესო თამაშები ჩატარდება და შესაბამისად ჩვენთან უფრო მეტი გულშემატკივარი დაიდებს ბინას".
თავად ეროვნული ნაკრებების წარმომადგენლები კი ბევრად გულწრფელ, მაგრამ მაინც პოლიტკორექტულ პასუხს იძლევიან შეკითხვაზე, რატომ მიანიჭეს უპირატესობა პოლონეთს - უკრაინაში კარგად არ ესმით რას ნიშნავს ევროპული გაგებით "განვითარებული ინფრასტრუქტურა", "კომფორტი" და რაც მთავარია, უკრაინელები ვერ აღიქვამენ (რატომღაც), რომ ყოველივე ეს ქვეყნის იმიჯს მძიმე დარტყმას აყენებს.
ყოველდღიური სპორტული გაზეთი "ლელო"
