დიეგოს ტურინიდან აბარგების შესახებ იმდენი ითქვა და დაიწერა, რომ დრო იყო, კომენტარი თავად ფეხბურთელსაც გაეკეთებინა. სანამ დიეგო ხმას ამოიღებდა, იქამდე მიუნხენის "ბაიერნის" დირექტორატის წარმომადგენელმა კრისტიან ნერლინგერმა გააკეთა განცხადება და შემდეგი თქვა:

"დიეგო ძალიან ძლიერი ფეხბურთელია და მისი გადაბირებით ნამდვილად ვართ დაინტერესებულნი. თუმცა, მოლაპარაკებები ჯერ არ დაწყებულა და საკითხავია, დაიწყება თუ არა საერთოდ. ჩვენს მიერ მოპოვებული უკანასკნელი ინფორმაციით, ბრაზილიელთან განშორებას ტურინელები არ აპირებენ და სურთ, მას კიდევ ერთი შანსი მისცენ. ისე, ბოლო დღეებში დაახლოებით რვა-ათი აგენტი დამიკავშირდა, რომლებმაც დიეგოსთან კონტრაქტის გაფორმება შემომთავაზეს. სიმართლე გითხრათ, ამან ძალიან დამაბნია".
ისე ისაუბრა დიეგომ, იფიქრებდით, რომ საერთოდ არ ყოფილა საუბარი მისი "იუვედან" სხვა გუნდში გადასვლის შესახებ. მოვუსმინოთ ბრაზილიელ გამთამაშებელს:

"ნერლინგერის კომენტარმა ძალიან გამაკვირვა, რადგან წარმოდგენა არ მაქვს, რომელ 8 და 10 აგენტზეა ლაპარაკი. ჩემს პირად საქმეებს მხოლოდ მამაჩემი უძღვება და ეს კარგად უნდა იცოდნენ "ბაიერნის" მესვეურებმა. ბავარიელებთან არანაირი კონტაქტი არ მქონია და საერთოდაც, ტურინიდან აბარგებას არ ვაპირებ. წინ ურთუილესი სეზონი გველის და არ მსურს ყურადღება ნაკლებად მნიშვნელოვან საკითხებზე გამეფანტოს".