"ლაციოს" პრეზიდენტი კლაუდიო ლოტიტო იმედოვნებს, რომ მისი გუნდი ამ სეზონში წარმტებით იასპარეზებს და ჩემპიონთა ლიგის საგზურს მოიპოვებს. ამის შესახებ ჟურნალისტებთან საუბარში განაცხადა და იქვე დასძინა, იანვარში გუნდს კიდევ რამდენიმე ფეხბურთელი დაემატებაო:

"ჩვენი მიზანი ოთხეულში მოხვედრა და ჩემპიონთა ლიგის საგზურის მოპოვებაა. ბევრს ეს უტოპიად მიაჩნია, მაგრამ მე ასე ნამდვილად არ ვიტყოდი. ჩვენ საკმაოდ ძლიერ შემადგენლობას მოვუყარეთ თავი და წესით, გრანდებს ღირსეული კონკურენცია უნდა გავუწიოთ. გადავხედოთ შეტევის ხაზს - ჩვენ გვყავს მაურო სარატე, ტომაზო როკი, სერჯო ფლოკარი და პასკუალე ფოჯა. ამასთან, გადმოვიბირეთ ერნანესი, რომელზეც ნამდვილი ნადირობა იყო გამოცხადებული. ასეთი თავდასხმით ნებისმიერი დაცვის გარღვევა შეგვიძლია და არ მესმის, რატომ არ უნდა დავისახოთ მაღალი მიზნები...

რაც შეეხება სატრანსფერო კამპანიას, მთლიანობაში მეტად წარმატებული გამოდგა. მართალია შეველიეთ რამდენიმე ფეხბურთელს, მაგრამ გვარიანადაც გავძლიერდით. პასიურობას არც ზამთრის სატრანსფერო პერიოდში ვაპირებთ, კიდევ რამდენიმე მოთამაშის დამატება გვსურს".