ინგლისის ნაკრების მთავარი მწვრთნელი ფაბიო კაპელო ფიფას რეიტინგში 117-ე ადგილზე მყოფ უელსთან არადამაჯერებელი გამარჯვებით უკმაყოფილო დარჩა. მაესტრომ ხაზი გაუსვა, რომ მის შეგირდებს უპირველესად ფსიქოლოგიური პრობლემები შეექმნათ, ხოლო მატჩის წინა მოთელვაზე შეამჩნია, რომ ზოგიერთი მათგანი საერთოდ არ იყო კონცენტრირებული.
ზოგიერთმა ტრიბუნების ზეწოლას ვერ გაუძლოო. იქვე მან ყველას მიანიშნა, რომ ამის აღმოსაფხვრელად მზადაა, მოთამაშეთა ნაწილს დაემშვიდობოს და ნაკრებში უფრო გაწონასწორებულებს უხმოს. იტალიელი ვარაუდობს, რომ მსოფლიოს 2010 წლის ჩემპიონატზე წარუმატებელმა გამოსვლამ ფეხბურთელებს დიდი დაღი დაასვა, რაც მათ ფსიქიკაში ღრმად არის დალექილი.
"რამდენიმე მნიშვნელოვან რამეს მატჩის დაწყებამდე მივხვდი, - თქვა დონ ფაბიომ. - მიყვარს მატჩის წინა მოთელვის ყურება, რადგან დაკვირვების საფუძველზე ხშირად მიწინასწარმეტყველებია, თუ რა მოხდებოდა შეხვედრაში. რას მივხვდი? მოდი, შევთანხმდეთ, რომ ეს ჩემი და ფეხბურთელების საიდუმლოდ დარჩება.
ვიცოდი, რომ რთული შეხვედრა გველოდა. ყველა მცდელობა ჯერ კიდევ თამაშის დაწყებამდე და პირველი ტაიმის შემდეგაც, ფუჭი აღმოჩნდა. ვერაფრის შეცვლა ვერ მოვახერხე. არადა, ვცადე, დავლაპარაკებოდი ფეხბურთელებს. მთავარი პრობლემა მათ თავებში იყო.
ხანდახან მართლა ვერ ვხვდები რა ხდება ხოლმე მათში. კარგად სულ 20 წუთი ვითამაშეთ, კი, მაგრამ რატომ არ უნდა გვეთამაშა იმავე დონეზე მთელი მატჩი? აი, სწორედ ამას ვერ ვიგებ. როცა ამის დროს მოვა ფეხბურთელებს კიდევ დაველაპარაკები, რადგან შეიძლება ისინი კარგად გამოიყურებოდნენ ვარჯიშებზე, ყველაფერს აკეთებდნენ რასაც ვავალებ, მაგრამ მატჩი დაიწყება თუ არა გადასხვაფერდნენ. იმედია, შევძლებ კონკრეტულ გადაწყვეტილებამდე მისვლას".
ყოველდღიური სპორტული გაზეთი "ლელო"
