საფრანგეთი-ესპანეთი 2:1
საფრანგეთი: დიალო, ნეგო, მავინგა, ფაური, კაკუტა, ფოფანა, სუნუ (69. ლაკაზეტი), გრიზმანი (46. ტაფერი), კოკელინი, კოლოძიეიჩაკი, ბაკამბუ.
ესპანეთი: ალექსი, მონტოია, პლანასი, ბარტრა, პულიდო (87. კალვენტე), რომეო, კეკო (64. მუნიაინი), ალკანტარა, როდრიგო (73. როჩინა), კანალესი, პაჩეკო.
გოლები: 0:1 როდრიგო (18), 1:1 სუნუ (49), 2:1 ლაკაზეტი (85)

საფრანგეთის ჩრდილოეთში დასრულდა ევროპის ჩემპიონატი 19-წლამდელ ფეხბურთელთა შორის. პირველობა ტრიუმფით დაასრულა მასპინძელთა ნაკრებმა, რომელმაც ფინალში ტურნირის აშკარა ფავორიტი ესპანეთი 2:1 დაამარცხა. 19-წლამდელთა შორის ევროპის ჩემპიონატი მეცხრედ გაიმართა. ფინალს კი ქალაქმა კაენმა უმასპინძლა. გასულ წელს ეს პირველობა უკრაინის ნაკრებმა მოიგო უკრაინაში, ახლაც მასპინძლებმა იპირველეს. ფრანსუა სმერეცკის გუნდი ფინალს აგებდა, მაგრამ მეორე ტაიმში თამაშის ბედის შემოტრიალება შეძლო.
სხვათა შორის, ეს ორი გუნდი ერთმანეთს ორი წლის წინათაც შეხვდა ერთმანეთს, 17-წლამდელთა ჩემპიონატის ფინალში, მაშინ "როხიტამ" 4:0 გადაურბინა მეტოქეს.

ანთალიური ფინალის 22 მონაწილიდან 11-მა დაიწყო ეს მატჩიც, თითქოს, ესპანელთა უპირატესობაც ახლაც აშკარა იყო. მე-18 წუთზე "ლივერპულელმა" დანი პაჩეკომ ბრწყინვალე პასი გაუჭრა მარცხენა ფლანგიდან როდრიგოს, რომელმაც ერთი შეხებით კარგად დაარტყა და ანგარიშიც გაიხსნა. პირველი ტაიმი ასე, ესპანელთა უპირატესობაში გაილია.

მეორე ტაიმში კი ყველაფერი თავდაყირა დადგა, ფრანგებმა შეუტიეს და უკვე მე-4 წუთზე გაათანაბრეს, სუნუმ ალექსს ბურთი თავზე გადაუგდო. არადა წამებით ადრე სერხიო კანალესი ვალდებულიც კი იყო ანგარიში 2:0 გაეხადა. უკვე ყველას რომ ეგონა, მატჩი დამატებით დროში გადადიოდა, 85-ე წუთზე ფრანგებმა გამარჯვების გოლი გაიტანეს, შეცვლაზე შემოსულმა ალექსანდრ ლაკაზეტმა გაიტანა გაელ კაკუტას პასით და ევროპის ჩემპიონის ტიტული გუნდს მოუპოვა.
ტურნირის ბომბარდირი 4 გოლით დანი პაჩეკო გახდა.