ფიფამ საერთაშორისო კავშირის 126-ე ყოველწლიური სხდომის დღის წესრიგი გამოაქვეყნა. აღნიშნული ორგანო უფლებამოსილია წესებში ცვლილებები და დაზუსტებები შეიტანოს. სხდომა 3 მარტს გაიმართება.
თავად ფეხბურთის საერთაშორისო ფედერაცია გამოდის ინიციატივით, შეიცვალოს მე-3 წესი ("შეცვლაზე შემომსვლელთა რაოდენობა") და მატჩის დამატებით დროში მოედანზე შესვლა მეოთხე ფეხბურთელს შეეძლოს.
გარდა ამისა, მე-12 წესის (წესების დარღვევა და არადისციპლინარული საქციელი) მრავალწლიანი განხილვის შემდეგ, ფიფა მზადაა ეგრეთ წოდებული სამმაგი სასჯელი გააუქმოს.
საუბარია იმ შემთხვევაზე, როცა ფეხბურთელი მეტოქეს გოლის გატანის დროს აკრძალული წესით აჩერებს. ამჟამინდელი წესით, დამრღვევს აძევებენ, მისი გუნდის კარში კი 11-მეტრიანი ინიშნება. ამასთან, გაძევებულ ფეხბურთელს დისკვალიფიკაციით სჯიან.
