თბილისს სამუშაო ვიზიტით ეწვია ფიბა-ს ინსტრუქტორი, ყოფილი მსაჯი და არბიტრთა მეთვალყურე ესპანელი ვიქტორ მასი. - იგი ორშაბათ-სამშაბათს ქართველ თემიდელებთან სემინარებს გამართავს. ასევე დაესწრება საქართველოს 20-წლამდელთა მატჩებს და დააკვირდება ჩვენი არბიტრების მოქმედებას, რომლებსაც საერთაშორისო ასპარეზისთვის ვამზადებთ, - გვითხრა ფიბა-ს კომისარმა მერაბ რატიშვილმა.
მან იქვე გვაცნობა, რომ ბატონი ვიქტორი პირადი ინსტრუქტორია მაკა კუპატაძისა, რომელიც ფიბა-ს კატეგორიის არბიტრია, ქალთა ევროლიგის მატჩებსაც მსაჯობს, თუმცა კიდევ უფრო მაღალი დონისთვის ემზადება (რაც ვაჟთა ევროტურნირებისა და ევროპის ფარგლებს გარეთ თამაშების გაძღოლასაც გულისხმობს).
- ვიქტორ მასს გავაცანი ჩვენი სიტუაცია, ავუხსენი, რომ გვჭირდება მხარდაჭერა და ჩამოსვლაზე სიამოვნებით დამთანხმდა. ეს ვიზიტი ფიბა-ს სპეციალურ პროგრამაში შევიდა. ვფიქრობ, ახალგაზრდა ქართველი არბიტრები ამ დღეებში გამოცდილი ინსტრუქტორისგან ბევრს ისწავლიან, - განგვიმარტა მაკა კუპატაძემ.
ყოველდღიური სპორტული გაზეთი "ლელო"
