ფილიპინებზე ფლორენსიო კამპომანესის მემორიალზე გუშინ ერთბაშად ორი ტურის პარტიები გათამაშდა. მერაბ გაგუნაშვილმა წინა ოთხი შეხვედრის მონაგარს ქულა შესძინა - ჩინელ იუნ ჟაოს და მის თანამემამულე ნი ჰუას დაუზავდა. თამაზ გელაშვილმა მარაგი მხოლოდ ნახევარი ქულით გაიმდიდრა: ჯერ ფილიპინელ რიჩარდ ბიტუნს შეუთანხმდა ყაიმზე, შემდეგ ემანუელ სენადორთან (ფილიპინები) დამარცხდა.

ექვსი ტურის შემდეგ ერთპიროვნულად იუნ ჟაო ლიდერობს, რომელმაც ლი ჩაოს დამარცხებით 5,5 ქულას მოუყარა თავი. მას თითო ქულით ჩამორჩებიან ვესლი სოუ (ფილიპინები), ეჰშან ჩაემი (ირანი), ჟონ ჟანი (სინგაპური), დარვინ ლაილო (ფილიპინები), ლირენ დინი (ჩინეთი), მერაბ გაგუნაშვილი, მურთაზ კაჟგალიევი (ყაზახეთი), იანჩაო ჟოუ (ჩინეთი), ლიემ ქუანგ ლი (ვიეტნამი).
გაგუნაშვილი დღეს თეთრებით დინს შეხვდება, გელაშვილი კი დავიდ ელორტას (ფილიპინები) დაუპირისპირდება.

ქალებში ჩინელი შენ იანი დაწინაურდა. გუშინ იგი თანამემამულე ჟაო სიუს დაუზავდა და 5 ქულა მოაგროვა. ნახევარი ქულით ნაკლები აქვს ვიეტნამელ ჰოანგ თხი ჰუს, რომელმაც კატერინე პერენასთან (ფილიპინები) გაიყო ქულა. 4-4 ქულით მესამე-მეხუთე ადგილებს ჟაო სიუ, სიაობინ გუ (ჩინეთი) და ათუშა პურკაშიანი (ირანი) იყოფენ.

საგულისხმოა, რომ კამპომანესის მემორიალის საპრიზო ფონდია 100 ათასი დოლარი. ვაჟთა ტურნირის პირველადგილოსანი 10 ათას დოლარს მიიღებს.