ნოვი სადში სერბეთის მოჭადრაკე ქალთა გუნდური ჩემპიონატის მე-8 ტურში ერთპიროვნული ლიდერი "იელიცა გორაჩიჩი", რომლის პირველ დაფაზეც ქართველი დიდოსტატი ნანა ძაგნიძე თამაშობს, საკმაოდ სუსტი მოჭადრაკეებით დაკომლექტებულ ბელგრადის "პოლიტიკას" დაუზავდა და, ფაქტობრივად, ორი ქულა დაკარგა. ძაგნიძემ კატერინა ტადიჩი დაამარცხა, კორაჩიჩელმა სანდრა დუკიჩმა სანია ვუკსანოვიჩს სძლია, მაგრამ ანჟელიკა სტოიანოვიჩი და ლენა მილადინოვიჩი მარიანა მარიჩსა და ნადეჟდა სტოიანოვიჩს დანებდნენ.

მეორე ადგილზე მყოფმა "ბას ბელგრადმა" 3:1 მოუგო "რად ბელგრადს" და ლიდერთან ქულათა სხვაობა მინიმუმამდე შეამცირა. გუშინ სწორედ პირველ-მეორე ადგილებზე მყოფი გუნდები დაუპირისპირდნენ ერთმანეთს. ძაგნიძემ შავი ფიგურებით ქულა გაიყო ნატაშა ბოიკოვიჩთან, მისი თანაგუნდელები კი მეტოქეებთან დამარცხდნენ. საბოლოოდ "ბას ბელგრადმა" 3,5:0,5 გაიმარჯვა და 24 ქულით დაწინაურდა. "გორაჩიჩმა" 22 ქულით მეორე ადგილზე გადაინაცვლა. მესამე ადგილზე მყოფ "იუგოვიჩ-კორის" 21 ქულა აქვს.

ჩემპიონატის დამთავრებამდე 2 ტური დარჩა. დღეს ლიდერი მეექვსეადგილოსან "ზლატან ნოვა ვაროს", ნანას გუნდი კი მე-8 ადგილზე მყოფ "რად ბელგრადს" შეხვდება.