სანკტ-პეტერბურგში დასასრულს უახლოვდება რუსეთის მოჭადრაკე ქალთა მე-60 საიუბილეო ჩემპიონატი. უმაღლესი ლიგის 34 წარმომადგენელი ეცილება ერთმანეთს პირველობას. მათგან ორი უცხოელია _ ქართველი ნაზი პაიკიძე და სერბეთის სახელით მოასპარეზე მარია მანაკოვა, რომელმაც 7 ტურში მხოლოდ 3,5 ქულა მოაგროვა და, პრაქტიკულად, საპრიზო ადგილებისთვის ბრძოლას გამოეთიშა. რაც შეეხება პაიკიძეს, გუშინ იგი მარია რომანკოს დაუზავდა და 5,5 ქულით სვეტლანა მატვეევასთან (მან ელენა ზაიაცთან გაიყო ქულა) ერთად პირველ-მეორე ადგილებს იყოფს. ლიდერებს ნახევარ-ნახევარი ქულით ჩამორჩებიან რომანკო, ზაიაცი და ტატიანა შადრინა. ეს უკანასკნელი დღეს მე-8 ტურში თეთრებით მატვეევას შეხვდება, ზაიაცი კი პაიკიძეს ეთამაშება.