ფილიპინებზე ფლორენსიო კამპომანესის მემორიალზე გუშინ მე-7 ტურის პარტიები გაიმართა. ლიდერთა ჯგუფში მყოფი მერაბ გაგუნაშვილი თეთრებით მხოლოდ ყაიმს გამორჩა ჩინელ ლირენ დინთან პაექრობისას და 5 ქულას მოუყარა თავი. მას ქულით ჩამორჩება თამაზ გელაშვილი, რომელმაც გუშინ ფილიპინელი დავიდ ელორტა დაამარცხა.

შეჯიბრებაზე 6 ქულით ისევ ჩინელი იუნ ჟაო მეწინავეობს. მე-7 ტურში იგი მასპინძელს უესლი სოუს დაუზავდა. ლიდერთა დანარჩენი პარტიები შედეგიანი აღმოჩნდა: ლიემ ქუანგ ლი (ვიეტნამი)-ეჰშან ჩაემი (ირანი) 1:0, იანჩაო ჟოუ (ჩინეთი)-ჟონ ჟანი (სინგაპური) 1:0, მურთაზ კაჟგალიევი (ყაზახეთი)-დარვინ ლაილო (ფილიპინები) 0:1, ეუგენიო ტორე (ფილიპინები)-ნი ჰუა (ჩინეთი) 1:0, ჯეისონ გონსალესი (ფილიპინები)-ანტონ ფილიპოვი (უზბეკეთი) 0:1, ტიგრან კოტანჯიანი (სომხეთი)-ემანუელ სენადორი (ფილიპინები) 0:1.
შვიდი ტურის შემდეგ 5,5-5,5 ქულით მეორე-მეოთხე ადგილებს ჟოუ, ლი და ლაილო იყოფენ. 6 მოჭადრაკეს 5-5 ქულა აქვს.

დღეს მე-8 ტურში გაგუნაშვილი სენადორს შეხვდება, გელაშვილი ოლივერ დიმაკილინგს (ფილიპინები) დაუპირისპირდება.