საქართველოს წლევანდელი ჩემპიონი, ეროვნული ნაკრების წევრი დიდოსტატი მერაბ გაგუნაშვილი წარმატებით ასპარეზობს ფილიპინებზე ფლორენსიო კამპომანესის საერთაშორისო მემორიალში. გუშინ მან შავი ფიგურებით მასპინძელი ემანუელ სენადორი დაამარცხა და 6 ქულით ლიდერებს მიუახლოვდა, თან პირველობის შანსიც შეინარჩუნა. გათამაშების ცხრილს 6,5-6,5 ქულით ჩინელები _ იუნ ჟაო და ძიან ჩაო ჟოუ ჩაუდგნენ სათავეში. ჟაო ვიეტნამელ ლიემ ქუანგ ლის შეუთანხმდა ყაიმზე, ჟოუმ კი ფილიპინელი დარვინ ლაილო დაამარცხა. წარმატებას მიაღწია უზბეკმა ანტონ ფილიპოვმა _ ეუგენიო ტორეს (ფილიპინები) ძლევით მან 6 ქულას მოუყარა თავი და გაგუნაშვილთან და ლისთან ერთად მესამე-მეხუთე ადგილებს ინაწილებს.

მემორიალში კიდევ ერთი ქართველი დიდოსტატი თამაზ გელაშვილი მონაწილეობს. მე-8 ტურში მან ოლივერ დიმაკილინგი დაამარცხა და 5 ქულა მოაგროვა.

მთავარი პრიზის ბედს დღეს ბოლო ტურის შემდეგი ორთაბრძოლების შედეგები გადაწყვეტს: ძიანჩაო ჟოუ (6,5)-ლიემ ქუანგ ლი (6), ანტონ ფილიპოვი (6)-იუნ ჟაო (6,5), მერაბ გაგუნაშვილი (6)-ეჰშან ჩაემი (5,5), მურთაზ კაჟგალიევი (5,5)-უესლი სოუ (5,5), ლირენ დინი (5,5)-ჟონ ჟანი (5,5), დარვინ ლაილო (5,5)-ნი ჰუა (5).

თამაზ გელაშვილი ინდოელ ჩანდა სანდიპანს შეხვდება.

ქალებში 8 ტურის შემდეგ 6,5 ქულით ჩინელი შენ იანი მეწინავეობს. ლიდერს ნახევარ-ნახევარი ქულით ათუშა პურკაშიანი (ირანი) და ჟაო სიუ ჩამორჩებიან.